Скопскиот аеродром меѓу европските рекордери: Патничкиот сообраќај пораснал за 34,8 отсто

Скопскиот аеродром во август забележал значителен раст на патничкиот сообраќај, со зголемување од 34,8 отсто во однос на истиот месец минатата година. Според извештајот на Европското здружение на аеродроми ACI EUROPE, со овој резултат Скопје е на петтото место меѓу средните европски аеродроми со годишен сообраќај од еден до 10 милиони патници.

Пред Скопје се аеродромите во Братислава со раст од 75,9 отсто, Трапани со 52,3 отсто и Подгорица со 47,6 отсто, додека Палермо бележи раст од 32,3 отсто.

— реклама —

Македонија во август е меѓу пазарите надвор од Европската Унија со најголем раст на воздушниот патнички сообраќај. Двоцифрен раст е регистриран и во Црна Гора од 28,6 отсто, Албанија со 20,7 отсто, Израел со 19,5 отсто, Ерменија со 14,2 отсто, Молдавија со 12,6 отсто и Узбекистан со 10,5 отсто.

Турција, како најголем пазар во оваа група, забележала раст од 4,4 отсто.

— реклама —

Во рамки на пазарот ЕУ+, најголем раст во август има Словачка со 61 отсто, по која следуваат Словенија со 19,3 отсто, Естонија со 16,4 отсто, Унгарија со 13 отсто и Малта со 12,3 отсто.

— реклама —

Најголем пад е забележан кај аеродромите во Исланд, од 9,3 отсто, потоа во Австрија од 6 отсто и Франција од 1,7 отсто. Намалување на сообраќајот има и во Кипар, Норвешка и Германија.

Меѓу најголемите пазари во ЕУ+, Италија во август бележи раст од 5,2 отсто, а Шпанија од 4,7 отсто. Обединетото Кралство има раст од 0,9 отсто, додека Франција и Германија остануваат под европскиот просек.

На ниво на Европа, патничкиот воздушен сообраќај во август пораснал за 3,1 отсто, по растот од 3,9 отсто во јули. Според извештајот, растот во август е повисок од оној во вториот квартал, кога изнесувал 1,3 отсто, период во кој врз воздушниот сообраќај влијаела и војната на Блискиот Исток.

Аеродромите надвор од пазарот ЕУ+ во август забележале раст од 6 отсто, додека кај аеродромите на пазарот ЕУ+ растот изнесувал 2,5 отсто.