(Видео) Славески ги обвини медиумите за пропаста на Алта банка: „Со шпекулациите создадоа недоверба“

Гувернерот на Народната банка, Трајко Славески, ги посочи медиумските шпекулации како причина за создавање недоверба во Алта банка во Србија, тврдејќи дека медиумите придонеле за нејзиното уривање. Во разговор со водителката Наташа Стојановска во Топ тема, тој го оспори и известувањето на британскиот „Фајненшл тајмс“, кој објави детали за финансиските проблеми на банката, сомнежите за перење пари и повлекувањето големи суми од нејзините сметки.

„’Фајненшл тајмс’ може сѐ да напише, тоа се дневни весници и така натаму. Да не се поведуваме по тоа“, рече Славески.

Стојановска му посочи дека и медиумите во Белград претходно пишувале за состојбата во Алта банка, по што следувало одземањето на нејзината дозвола за работа.

— реклама —

Гувернерот, сепак, не се согласи со оценката дека медиумските информации се покажале како точни.

„Не се покажаа како точни. Еве и сега пишуваа медиумите, тие ја урнаа Алта Банка, со тие шпекулации дека се изнесуваат пари во Македонија...“, изјави Славески.

На директното прашање на Стојановска дали со тоа ги обвинува медиумите за пропаѓањето на банката, гувернерот одговори:

— реклама —

„Па видете, кога се создава атмосфера на недоверба, банките се кршливи институции, кревки“.

Водителката повторно го соочи со информациите за наводно изнесување милиони од банката од страна на сопственикот Давор Мацура.

„И медиуми се виновни за тоа што пишувале за случувањата во српската Алта банка?“, го праша Стојановска, откако ги спомена наводите дека Мацура влегувал во трезорот и изнесувал пари.

„Тие треба да откријат кај ги однел тие пари“, одговори Славески.

— реклама —

Изјавите на гувернерот доаѓаат откако Народната банка на Србија ја одзеде дозволата за работа на Алта банка, образложувајќи дека нејзината финансиска состојба значително се влошила и дека постоел ризик од дополнително нарушување на ликвидноста.

Британскиот „Фајненшл тајмс“ објави дека, според српски функционери, во деновите по изборите клиентите повлекувале големи суми и префрлале значителни средства во странство. Весникот извести и за претходни проверки на матичната групација поради сомнежи за перење пари, кои од „Алта“ ги отфрлаат, нагласувајќи дека не била утврдена нивна одговорност за незаконско работење.

— реклама —

Во Македонија, Народната банка воведе привремена администрација во Алта банка АД Битола, но нагласи дека македонската банка е ликвидна и високо капитализирана и дека не ѝ е одземена дозволата за работа.

Изјавите на Славески отвораат прашање дали медиумското известување за финансиските проблеми може да се посочи како причина за пропаѓање на банка, особено кога српскиот регулатор официјално констатирал значително влошување на нејзината финансиска состојба.