Словенците денес на четири референдуми: За укинување на РТВ-претплатата и ограничување на правото на глас за странци

Во Словенија денеска се отворени избирачките места на кои граѓаните се изјаснуваат за четири референдумски прашања. Меѓу нив се укинувањето на задолжителната радиодифузна такса, ограничувањето на правото на глас на странските државјани на локалните избори и измените на законот за парламентарни истраги.

Избирачките места се отворени од 7 до 19 часот, а првите резултати се очекуваат по 20:30 часот, пренесува словенечката новинска агенција СТА.

Граѓаните можат да гласаат за едно или за повеќе од четирите прашања, но избирачкото место можат да го посетат само еднаш.

— реклама —

Најголемо внимание привлекува законодавниот референдум за измените на Законот за парламентарни истраги, усвоени од словенечкиот парламент на 26 мај.

Граѓански организации, со поддршка од опозицијата, собрале 40.000 потписи за распишување на референдумот. Тие сметаат дека новите законски решенија ја намалуваат правната заштита на граѓаните и им даваат преголеми овластувања на политичарите за навлегување во приватноста.

Критичарите предупредуваат дека измените би можеле да отворат простор за политички пресметки и злоупотреба на парламентарните истраги.

— реклама —

Загриженост изразила и група правни експерти од правните факултети во Љубљана и Марибор. Според нив, измените ја намалуваат заштитата на лицата опфатени со истрагите, како и на граѓаните и компаниите чии лични или деловни податоци би можеле да бидат откриени во текот на постапките.

За законот да биде отфрлен, против него треба да гласа мнозинство од гласачите што ќе излезат на референдумот, а истовремено против да се изјаснат најмалку 20 проценти од сите избирачи со право на глас.

Покрај законодавниот референдум, се одржуваат и три советодавни референдуми.

— реклама —

На првиот граѓаните се изјаснуваат дали треба да се укине задолжителната радиодифузна такса за програмите на јавниот сервис Радио-телевизија Словенија.

Второто прашање се однесува на социјалната помош. Гласачите одлучуваат дали работоспособните лица кои немаат објективни пречки за работа треба да го остваруваат правото на парична социјална помош под услов да вршат општествено корисна работа.

Третото прашање е поврзано со правото на глас на локалните избори. Граѓаните се изјаснуваат дали тоа право треба да биде ограничено на словенечките државјани и државјаните на другите земји членки на Европската Унија, со што би биле исклучени државјаните на земјите надвор од ЕУ.

За разлика од законодавниот референдум, резултатите од трите советодавни референдуми не се правно обврзувачки, туку треба да послужат како насока за парламентот при носењето одлуки.

Според податоците на Државната изборна комисија на Словенија, на предвременото гласање, кое се одржувало од вторник до четврток, гласале 75.401 избирач, односно 4,44 проценти од вкупниот број граѓани со право на глас.

По затворањето на избирачките места, најпрво ќе се пребројуваат гласовите на законодавниот референдум, а потоа и гласовите за советодавните прашања поврзани со социјалната помош, правото на глас на локалните избори и укинувањето на РТВ-претплатата.