Словенечка операција во близина на границата со Хрватска, откриени 99 мигранти во камион

Словенечката полиција уапсила двајца мажи, државјани на Србија и Словачка, во два одделни случаи во кои се обиделе незаконски да пренесат повеќе од 120 странски државјани.

Првиот случај бил откриен во средата наутро, откако граѓанин пријавил дека во близина на Дрново, околу 30 километри по граничниот премин Брeгана, забележал повеќе лица како излегуваат од камион, по што возилото продолжило да се движи.

— реклама —

Полицијата набрзо го лоцирала камионот со српски регистарски ознаки на граничниот премин Обрежје и го уапсила 37-годишниот возач, државјанин на Србија. Камионот, кој превезувал пченица, бил одземен.

На поширокото подрачје на Дрново полицајците потоа пронашле 99 странски државјани – 69 од Бангладеш, 28 од Пакистан и по еден државјанин на Гана и Непал.

— реклама —

Против српскиот државјанин ќе биде поднесена кривична пријава за незаконско преминување на државната граница или територија, по што ќе биде изведен пред истражен судија. Странските државјани што незаконски влегле во Словенија во меѓувреме побарале меѓународна заштита.

— реклама —

Уште истиот ден попладнето полицијата постапувала и по втора пријава од граѓанин, кој кај Јесенице забележал сомнително однесување на возач на комбе.

Возилото било запрено во Дрново, а со него управувал 27-годишен државјанин на Словачка. Во комбето биле пронајдени 27 лица што незаконски влегле во Словенија. Возачот бил лишен од слобода, а комбето било одземено. И против него ќе биде поднесена кривична пријава.

Во вториот случај станува збор за 25 државјани на Египет и по еден државјанин на Турција и Русија. Постапката за нив сè уште е во тек.

Од словенечката полиција им се заблагодарија на граѓаните што ги пријавиле сомнителните ситуации, нагласувајќи дека нивната брза реакција значително помогнала во откривањето на двата случаи.