Словенија се откажува од „деветолетката“, од 2028 година се враќа осумгодишното основно образование

Словенија најави голема реформа на образовниот систем по објавувањето на резултатите од ПИСА 2025, според кои учениците постигнале најслаби резултати откако се спроведува истражувањето.

Словенечкиот министер за образование, наука и млади, Борут Рончевиќ, најави укинување на деветгодишното основно образование и постепено воведување преобликуван модел на осумгодишно основно образование од учебната 2028/2029 година.

— реклама —

„Состојбата е многу лоша, а трендот катастрофален“, оцени Рончевиќ, пренесуваат словенечките медиуми.

— реклама —

Реформата предвидува и повисоки критериуми при оценувањето, зајакнување на работната етика, растеретување на наставните програми со поголем акцент на разбирањето на материјалот и дополнителна поддршка за талентираните ученици.

Резултатите од ПИСА 2025 покажуваат дека словенечките ученици во математичката и читачката писменост паднале под просекот на ОЕЦД, додека резултатите по природни науки се околу просекот. Во математика основното ниво го достигнале 65 проценти од учениците, а во читање 64 проценти, наспроти 69 проценти просек на ОЕЦД.

— реклама —

Како причини за негативниот тренд се посочуваат прекумерната употреба на дигитални уреди, нарушувањето на наставата и намалената концентрација. Според податоците, 48 проценти од учениците користат алатки со вештачка интелигенција за изработка на училишни задачи.

Проблем претставува и недостигот од наставен кадар. Само 17,5 проценти од учениците посетуваат училишта чии директори не го наведуваат недостигот од наставници како пречка во работата.

Од Синдикатот за воспитание, образование, наука и култура на Словенија оценија дека слабите резултати се последица на повеќегодишното занемарување и недоволното системско вложување во образовниот кадар.