Демократска Република Конго соопшти дека бројот на потврдени смртни случаи од ебола се искачил на 101, додека епидемијата продолжува да се шири во повеќе делови од земјата.
Според најновите податоци на властите, во изминатите 24 часа се регистрирани 35 нови потврдени случаи, меѓу кои и 10 смртни исходи. Со тоа, вкупниот број на заразени достигна 550 лица.
Епидемијата, предизвикана од реткиот сој на вирусот Бундибуџо, беше официјално прогласена на 15 мај. Заболени се регистрирани во 17 здравствени зони во провинцијата Итури, како и во Северен и Јужен Киву.
Властите предупредуваат дека напорите за ставање на болеста под контрола се дополнително отежнати поради недовербата на локалното население и активностите на вооружени групи. Пријавени се повеќе напади врз центри за лекување и тимови задолжени за безбедно погребување на жртвите од еболата.
Во последниот таков инцидент, што се случил во неделата, две лица биле тешко повредени, а оштетени биле и две возила.
Според извештајот на конгоанските власти, присуството на вооружени групи во областите Џугу, Ируму и Мамбаса во провинцијата Итури сериозно го ограничува пристапот на хуманитарните и здравствените работници до погодените региони.
Трите провинции – Итури, Северен Киву и Јужен Киву – со години се погодени од вооружени конфликти, што дополнително ја усложнува борбата против ширењето на опасниот вирус.
