„Со изградбата на интерконекторите со Грција и Србија, државата добива целосна вертикална енергетска поврзаност“, вели Мицкоски

Премиерот Христијан Мицкоски оцени дека изградбата на гасните интерконектори со Грција и Србија ќе ја зајакне енергетската и геостратешката позиција на Македонија, овозможувајќи целосна вертикална поврзаност долж Коридорот 10.

Според Мицкоски, интерконекторот со Грција се очекува да биде завршен во првата половина од следната година, додека поврзувањето со Србија е планирано да биде комплетирано до крајот на 2028 година. Тој посочи дека со реализацијата на двата проекта земјава ќе добие дополнителни можности за снабдување и поврзување со регионалните енергетски пазари.

— реклама —

Премиерот нагласи дека значењето на проектите е поголемо од самата енергетска инфраструктура, бидејќи Македонија, како земја без излез на море, преку поврзувањето со соседните држави и нивните пристаништа ја подобрува својата геостратешка позиција. Како пример го посочи терминалот во Александрополи, како и поврзаноста со Солун и инфраструктурата поврзана со „ОКТА“.

Интерконекторот со Србија ќе биде двонасочен, што, според Мицкоски, дополнително ја зголемува неговата вредност и стратешко значење.

— реклама —

Тој особено ја истакна улогата на домашните компании во реализацијата на стратешките инфраструктурни проекти, посочувајќи дека и во овој случај работите ќе ги изведува македонска компанија.

„Македонски компании да изведуваат вакви стратешки проекти е многу важно за македонската економија“, рече Мицкоски, изразувајќи очекување изведувачот да ги искористи своето искуство и капацитети и да ги испочитува договорените рокови.

— реклама —

Како трета важна придобивка, премиерот го наведе исполнувањето на владината стратешка цел Македонија да стане раскрсница на паневропските коридори 8 и 10. Според него, оваа стратегија се темели на инфраструктурно, енергетско и друго регионално поврзување.

Мицкоски се заблагодари на раководството и вработените во НОМАГАС, како и на членовите на Владата кои биле вклучени во реализацијата на проектот.

Тој посочи и дека се разгледува можноста за изградба на гасна врска со Косово. За таа цел, како што рече, физибилити-студијата треба да даде одговор за оправданоста и потребите од вакво поврзување во иднина.

Премиерот порача дека Владата ќе продолжи со реализација на проектите предвидени во нејзината програма, меѓу кои е и енергетското поврзување на земјава со соседите.