Со пронајдени туѓи картички направиле трансакции од над 7.000 денари

Две кривични пријави биле поднесени во Кавадарци и Неготино против лица кои, според пријавите, пронашле туѓи платежни картички и ги употребиле без согласност на сопствениците.

— реклама —

ОВР Кавадарци поднела кривична пријава против Р.Н. (70) од Кавадарци поради постоење основи на сомнение за сторено кривично дело „оштетување и неовластено навлегување во компјутерски системи“.

— реклама —

Според пријавата, тој претходно пронашол туѓ паричник, а на 5 август 2026 година, без дозвола и согласност на сопственикот, ја употребил платежната картичка. Во четири наврати извршил наплата, при што, според МВР, се стекнал со противправна имотна корист од 3.729 денари.

— реклама —

Во вториот случај, ОВР Кавадарци поднела кривична пријава против А.Т. (27) од Неготинско, исто така поради сомнение за „оштетување и неовластено навлегување во компјутерски системи“.

На 7 септември 2026 година, пријавениот пронашол дебитна платежна картичка од банка, по што, без дозвола и согласност на сопственикот, ја употребил и реализирал три успешни трансакции. На тој начин, според пријавата, се стекнал со противправна имотна корист од 3.645 денари.