Пратеничката на СДСМ, Бисера Костадиновска-Стојчевска, на седницата на собраниската Комисија за буџет оцени дека предложениот ребаланс на Буџетот покажува дека културата не е меѓу приоритетите на Владата. Според неа, наместо поголеми инвестиции во културното наследство, македонскиот јазик и капиталните проекти, се намалуваат средствата токму во овие области.
Таа истакна дека зад буџетските бројки, според неа, стои политика на запоставување на културата и недоволна транспарентност во трошењето на јавните средства.
„Овој ребаланс покажува дека она што не му било приоритет на министерот повторно останува загрозено. Културното наследство, македонскиот јазик и важните културни проекти повторно се оставени без вистинска поддршка“, изјави Костадиновска-Стојчевска.
Пратеничката посочи дека владејачкото мнозинство не го прифатило предлогот на СДСМ за формирање фонд за културно наследство, кој би се финансирал од средствата од игрите на среќа.
Во однос на Инспекторатот за употреба на македонскиот јазик, таа рече дека наместо кадровско зајакнување и нови инспектори, средствата се насочуваат кон набавка на канцелариска опрема.
Костадиновска-Стојчевска ја критикуваше и, како што рече, нетранспарентноста во работата на Министерството за култура и туризам, наведувајќи дека веќе две години не се објавуваат резултатите од годишните конкурси за финансирање проекти од национален интерес.
Таа додаде дека со ребалансот се намалуваат средствата и за реконструкцијата на Музејот на Република Северна Македонија, каде се чуваат значајни артефакти и вратени икони, како и за Агенцијата за филм, што, според неа, може да ги доведе во прашање повеќегодишните филмски проекти.
„Културата, јазикот и културното наследство не смеат да бидат последна ставка во буџетот. Потребна е политика која ќе ги штити и развива, а не политика која ќе ги запоставува“, порача Костадиновска-Стојчевска.
