Бугарското Министерство за надворешни работи се огради од скандалот поврзан со објавувањето на дипломатска нота што содржи информации за патувањето на семејството на македонскиот премиер Христијан Мицкоски во Пампорово, тврдејќи дека станува збор за документ што се однесува на „настани од далечното минато“.
Во реакцијата на официјална Софија се наведува дека Министерството не дистрибуирало дипломатска нота или друга официјална кореспонденција поврзана со посетата на членови на семејството на официјален претставник на друга држава.
„Информациите што циркулираат во јавноста во последните денови се однесуваат на вербална нота од 6 јануари 2026 година и се однесуваат на настани од далечното минато. Во моментов, оваа информација не може да се сфати како основа за заклучоци дека постои непосредна закана за безбедноста на граѓаните на Бугарија или друга земја“, соопшти бугарското МНР.
Оттаму посочуваат дека придаваат големо значење на заштитата на дипломатската кореспонденција и дека строго ги почитуваат меѓународните правила и практики во оваа област.
Реакцијата на Софија следува откако бугарскиот амбасадор во Скопје беше повикан во македонското Министерство за надворешни работи и надворешна трговија, каде што беше побарано објаснување за тоа како доверливи информации за патувањето на семејството на премиерот се нашле во јавноста.
Премиерот Христијан Мицкоски претходно изјави дека за случајот го информирал и НАТО, оценувајќи дека со објавувањето на документот била загрозена безбедноста на неговото семејство.
Станува збор за допис од македонската Амбасада во Бугарија до бугарското Министерство за надворешни работи, во кој, според објавените информации, се содржани детали за обезбедувањето на семејството на премиерот, вклучително и податоци за возилата, членовите на обезбедувањето, комуникациската опрема и други безбедносни аспекти.
Министерот за надворешни работи и надворешна трговија Тимчо Муцунски инцидентот го оцени како неприфатлив во односите меѓу двете земји и побара извинување и брза реакција од бугарските институции.
