Сончево и топло време со температури до 30 степени се очекува денес низ Македонија, а во попладневните часови во делови од земјата ќе има услови за локална нестабилност со пороен дожд, грмежи и засилен ветер.
Според прогнозата, времето ќе биде претежно сончево со мала до умерена облачност, а ќе дува слаб до умерен северен ветер, кој на одредени места повремено ќе засилува.
Минималните температури ќе се движат од 8 до 16 степени, додека максималните дневни температури ќе достигнат од 23 до 30 степени.
Во Скопје се очекува сончево и топло време со мала до умерена облачност и слаб до умерен северен ветер. Температурата во главниот град ќе се движи од минимални 14 до максимални 29 степени.
Метеоролозите најавуваат дека и во текот на новата седмица времето ќе остане сончево и топло, со мала до умерена облачност. Во попладневните часови повторно ќе има услови за локален развој на нестабилна облачност проследена со пороен дожд, грмежи и засилен ветер, особено во четврток.
