Професорката Мирјана Најчевска во објава на социјалните мрежи остро ги критикува општествените состојби, посочувајќи дека во земјата се создава атмосфера во која негативните појави стануваат прифатливи, додека нивното јавно именување се смета за проблем.
Таа вели дека станало „нормално“ некој да биде неспособен, да добие јавна функција, да носи лоши одлуки и потоа да влијае врз воспитувањето и образованието на новите генерации, но дека е неприфатливо таквата личност да биде наречена со вистинското име.
Според Најчевска, слично е и со криминалот. Таа критикува што, како што наведува, луѓе со криминални интереси можат да стигнат до функции, да креираат политики и да се опкружат со истомисленици, додека оние што јавно го посочуваат проблемот се соочуваат со осуда.
Во својата објава таа се осврнува и на лагите, посочувајќи дека е создадено општество во кое некој може да гради кариера врз основа на невистини, но истовремено е непожелно таквото однесување да се именува и критикува.
Најчевска оценува дека најголемиот проблем е што оние што ја имаат моќта можат да носат одлуки со кои ја загрозуваат сегашноста и иднината на граѓаните, додека граѓаните се ограничени во можноста гласно да се спротивстават и да се борат за своите права и иднина.
„Кое тажно општество создадовме“, заклучува Најчевска.
