Шпански премиер: Гладот се користи како оружје, Газа е пример за тоа

Шпанскиот премиер Педро Санчез предупреди дека гладот сè почесто се користи како „многу евтино оружје“ во воените конфликти и го обвини Израел за изгладнување на населението во Газа.

Говорејќи на конференција за безбедност на храната во рамките на Римската недела на исхрана, Санчез изјави дека повеќе од 700 милиони луѓе во светот немаат сигурен пристап до храна, додека милиони деца страдаат од неухранетост.

— реклама —

„Гладот денес е токму тоа – оружје“, рече шпанскиот премиер, оценувајќи дека станува збор за „очигледно кршење на меѓународното хуманитарно право“.

Санчез посочи дека во последните осум години биле регистрирани повеќе од 20.000 напади врз пазари, земјоделски површини и системи за дистрибуција на храна.

— реклама —

Посебно ја издвои ситуацијата во Газа.

„Во Газа некои се обидуваат да добијат војна така што цел народ го изгладнуваат до покорност“, изјави тој.

— реклама —

Шпанскиот премиер го критикуваше и односот на Израел кон членовите на хуманитарната флота што минатата недела се обидела да достави помош во Газа.

Тој предупреди и на можност од нова глобална прехранбена криза поради војните, прекините во синџирите на снабдување и затворањето на важни трговски рути како Ормутскиот теснец.

Според Санчез, цените на ѓубривата веќе пораснале за дури 50 проценти, а последиците од кризата ги чувствуваат и европските граѓани преку поскапувањето на храната.

Санчез соопшти и дека Шпанија оваа година ја зголемила развојната помош за 13 проценти и најави продолжување на поддршката за меѓународните напори против гладот.