Мајките со деца до една година во Србија ќе можат да добијат до 2,5 милиони динари државна помош за купување селска куќа со двор, доколку ги исполнуваат условите од двете програми за државна поддршка.
Владата на Србија во технички мандат денеска ја усвои Уредбата со која се овозможува комбинирање на две мерки – едната преку Министерството за грижа за селото, а другата преку Министерството за грижа за семејството и демографијата.
Преку Програмата за купување селска куќа со двор може да се добијат до 1,5 милиони динари, додека дополнителни до еден милион динари се обезбедуваат преку субвенцијата за купување прва недвижност по основа на раѓање дете. Со тоа, куќа чија пазарна вредност не надминува 2,5 милиони динари може да се купи без дополнително вложување сопствени средства.
Министерката за грижа за семејството и демографијата во технички мандат, Јелена Жариќ Ковачевиќ, изјави дека поврзувањето на двете мерки создава услови мајките преку купување селска куќа трајно да го решат станбеното прашање.
„Сакаме да ја унапредиме структурата на населението во руралните подрачја, да го поттикнеме демографскиот развој и на семејствата да им обезбедиме поконкретна поддршка во моментот кога решаваат едно од најважните животни прашања“, рече таа.
Според неа, семејствата, односно мајките кои сакаат да живеат и работат во селските средини и ги исполнуваат условите на двете министерства, на овој начин полесно можат да дојдат до дом што одговара на нивните потреби.
Министерството за грижа за семејството и демографијата и Министерството за грижа за селото на 28 август потпишале Меморандум за соработка за поврзување на двете мерки.
Претходно, на 11 септември, Владата усвои измени на програмата за доделување неповратни средства за купување селска куќа со двор за 2026 година, со што правото на учество било проширено и на мајки на новородени деца, без старосно ограничување за мајката.
Со денешното усвојување на Уредбата, според Владата, се создаваат дополнителни услови заинтересираните семејства да ги искористат средствата од двете програми.
