Србија денеска ја добива првата фабрика за хуманоидни роботи, која е отворена во Шабац од страна на кинеската групација „Минт“. На свеченото отворање присуствува српскиот претседател Александар Вучиќ, како и претставници на компанијата, бизнис-секторот и локалните власти.
Во новиот погон, кој е прв од ваков вид во Србија и регионот, ќе се произведуваат хуманоидни роботи наменети за различни примени, првично во индустријата, а во иднина и во домаќинствата.
Компанијата „Минт“, која во Србија работи од 2018 година, досега има отворено 10 фабрики, од кои четири се во Шабац. Во новата фабрика досега се инвестирани 20 милиони евра, а планирано е да бидат вработени меѓу 200 и 250 луѓе.
По завршувањето на проектот, од погонот во Шабац годишно се очекува да се извезуваат околу 20.000 роботи на пазарот на Европската Унија.
Роботите ќе се произведуваат како основни уреди, а потоа со помош на вештачка интелигенција ќе се програмираат за различни задачи и намени. Според најавите, првично ќе се користат во индустријата, каде што ќе можат да фаќаат и преместуваат предмети благодарение на своите сензомоторни способности.
Проектот се очекува да има влијание и врз образованието и вработувањето во Шабац. Во градот постојат средни училишта кои образуваат кадри во областа на програмирањето, а младите ќе имаат можност за работа и дополнително образование во современи кинески центри во оваа област.
Новата фабрика треба да ги поврзе производството на хардвер и развојот на софтвер, а организаторите најавија и демонстрација на способностите на роботите на простор од 3.000 квадратни метри.
Компанијата „Минт“ се очекува да стане еден од значајните индустриски субјекти во Шабац, со оглед на планираното производство, инвестициите и примената на современи технологии.
