Србија е единствената што не ја потпиша Киевската декларација на самитот во Украина

Србија беше единствената земја што не ја потпиша Киевската декларација, усвоена на Самитот Украина – Југоисточна Европа, одржан во Киев, јави Радио-телевизија Србија (РТС).

— реклама —

Документот го потпишаа украинскиот претседател Володимир Зеленски и претставници на Албанија, Грција, Молдавија, Романија, Хрватска, Словенија, Македонија, Црна Гора и Бугарија. Србија, која на самитот беше претставена од претседателот Александар Вучиќ, не се приклучи кон декларацијата.

— реклама —

Во декларацијата Русија се обвинува за „незаконска, неиспровоцирана и неоправдана агресија“ врз Украина и се повикува веднаш да ги прекине воените дејствија и целосно да ги повлече своите сили од украинската територија.

Одговарајќи на прашање какви реакции очекува поради посетата на Киев, Вучиќ изјави дека е подготвен да ги сослуша сите критики.

— реклама —

„Секогаш ги слушам сите забелешки што доаѓаат од целиот свет. Така функционира демократијата“, изјави српскиот претседател.

Тој посочи дека со Зеленски разговарал и за развој на транспортни коридори кон Ерменија, Азербејџан и Турција, оценувајќи дека тие проекти би биле од големо значење за подобра регионална поврзаност и идни инвестиции.