Србија во изминатата деценија бележи значително подобрување на повеќе економски и социјални показатели, а новата анализа на списанието „Макроекономски анализи и трендови“ (МАТ) го оценува овој процес како „еден од најимпресивните општествено-економски пресврти во Европа“.
Според податоците објавени во најновиот број на МАТ, најзначајни промени се забележуваат во периодот од 2013 до 2025 година, особено во областа на вработеноста и животниот стандард.
Стапката на невработеност значително се намалила – од 23 отсто во 2013 година на 7,2 отсто во второто тримесечје од 2026 година. Во исто време, бројот на формално вработени е зголемен за повеќе од 300.000.
Значителен пад е забележан и кај тешката материјална депривација кај вработените, која го мери степенот до кој поединци или домаќинства не можат да си ги обезбедат основните материјални услови, добра и активности неопходни за достоинствен живот. Овој показател паднал од 31,3 отсто во 2014 година на 6,2 отсто во 2025 година.
Според анализата, со тоа Србија сега има подобар резултат од Германија, Франција и просекот на Европската Унија.
Намалување е регистрирано и кај ризикот од сиромаштија и социјална исклученост. Показателот АРОПЕ се намалил од 43,2 отсто на 23,2 отсто, додека јазот во однос на Европската Унија, според МАТ, е намален за 87 отсто.
Податоците покажуваат и дека само 4,5 отсто од граѓаните во Србија не можат да си дозволат да купат нова облека, додека просекот во Европската Унија изнесува 7,4 отсто.
Напредок е забележан и кај куповната моќ на населението. Во 2013 година просечната плата во Србија покривала околу 60 отсто од вредноста на потрошувачката кошница, додека денес просечната плата ја надминува нејзината вредност.
Според МАТ, овие показатели укажуваат на значително подобрување на животниот стандард во Србија во изминатите години.
