Србија би можела да започне со сериско производство на балистички ракети со голем дострел во рок од една година, најави српскиот претседател Александар Вучиќ на Бизнис-самитот Србија–Узбекистан.
Вучиќ истакна дека Србија напредува во одбранбената индустрија и дека земјата е подготвена самостојно да го реализира проектот, но изрази и подготвеност за соработка со Узбекистан во развојот на оваа технологија.
Во текот на обраќањето, Вучиќ го прашал Ненад Милорадовиќ, помошник на министерот за одбрана за материјални ресурси, колку време е потребно за започнување со производството на балистички ракети со голем дострел. Според Милорадовиќ, потребна е околу една година.
Вучиќ потоа најави дека Србија за една година би можела да започне со производство, додавајќи дека краткодометните ракети веќе се произведуваат.
„Тоа се вести за кои ретко зборуваме со граѓаните на Србија, но тие сведочат за нашиот технолошки и индустриски напредок“, рече Вучиќ.
Тој додаде дека српските стручњаци веќе работат на проектот и дека Белград е подготвен да соработува со Узбекистан и во оваа област.
