Србин ги пресекол решетките од прозорот на ќелијата, се искачил на покривот и побегнал од затвор во Германија

Германската полиција трага по 35-годишен Србин кој во неделата рано наутро успеал да побегне од затвор во Дуизбург, во Северна Рајна-Вестфалија. Германските медиуми го наведуваат како Саша Д., додека во потерницата на полицијата е наведено само презимето Стојановиќ.

Бегството се случило околу 3:30 часот наутро. Затвореникот ги пресекол решетките на прозорецот од ќелијата на третиот кат, потоа се искачил на четвртиот кат и преку покривот успеал да го напушти затворот.

— реклама —

Истрагата покажала дека во неговата ќелија било пронајдено скриено место во подот, за кое надлежните се сомневаат дека го користел за да сокрие алат со кој ги пресекол челичните решетки.

„Мора да се претпостави дека тука го чувал алатот со кој воопшто можел да ги пресече челичните шипки“, изјавил портпарол на Министерството за правда.

— реклама —

Министерството за правда на Северна Рајна-Вестфалија веќе започнало истрага за тоа како било овозможено бегството. Случајот дополнително го зголемува притисокот врз покраинскиот министер за правда Бенџамин Лимбах, особено по истрагите против неколку затворски чувари во покраината поради сомнежи дека примале поткуп за внесување телефони и други забранети предмети во затворите.

— реклама —

Опозициската пратеничка Соња Бонгерс побара од министерот да објасни како затвореникот дошол до потребниот алат и зошто безбедносните и техничките мерки не го спречиле бегството.

Бегалецот бил во притвор од почетокот на февруари поради сомнение за тешка кражба. Претходно бил осуден на шест години затвор за провали во станови, но пресудата сè уште не е правосилна. Тој бил прогласен за виновен за кражба на вреден накит и околу 200.000 евра во готовина.

Германскиот весник „Билд“ објавил и негова фотографија, наведувајќи дека на надлактицата има карактеристична тетоважа со лик на жена. Полицијата продолжува со потрагата по него.

Интересно е што во Германија самото бегство од затвор не се смета за кривично дело, освен доколку при бегството не се извршат други кривични дела.