Среде најголемите пожари, 400 пожарникари оставени без плата, обвини СДСМ

СДСМ денеска обвини дека повеќе од 400 пожарникари, ангажирани преку општините со месечен надоместок од 24 илјади денари, сè уште не добиле ниту една плата. На прес-конференција портпаролката на партијата, Богданка Кузеска, истакна дека луѓето кои биле селектирани и вклучени во август останале без примања до 17 септември.

— реклама —

Според Кузеска, информациите кои стигнале до СДСМ од различни општини укажуваат дека исплатите се блокирани поради изборниот процес, бидејќи станува збор за „вонредно плаќање“.

— реклама —

„Ова значи дека Владата ги излажала овие млади луѓе и граѓаните. Им ветиле ангажман, обуки и трајни вработувања, а потоа ги оставиле без денар, а граѓаните без потребна заштита,“ изјави таа.

— реклама —

Кузеска го повика премиерот Христијан Мицкоски да одговори дали овие информации се точни и кој ќе ја преземе одговорноста.

„Во време на пожари и еколошки катастрофи, наместо зајакнување на системот за заштита и спасување, добивме евтин ПР. Изгоре 20 отсто од територијата, депониите се палат, граѓаните се гушат. Кој ќе одговара за оваа катастрофа?“ рече Кузеска.