Српската полиција уапси петмина осомничени за сексуална злоупотреба на деца, наводно ги намамувале преку лажни профили

Полицијата во Србија уапси пет лица осомничени за поседување материјали со сексуална злоупотреба на деца и за нивна онлајн сексуална експлоатација, објави „Н1“.

— реклама —

Осомничените се на возраст од 24 до 59 години и се од Белград, Ваљево, Нови Сад, Сремска Митровица и Ниш.

Според српското Министерство за внатрешни работи, постои сомнение дека подолг временски период преку интернет преземале, чувале и споделувале материјали што прикажуваат сексуална злоупотреба на деца.

— реклама —

Истрагата покажала дека преку социјални мрежи и апликации креирале лажни профили, претставувајќи се како девојчиња на возраст од 11 и 12 години, со цел да стапат во контакт со малолетници. Од нив, според сомнежите, барале и добивале фотографии и видеоматеријали со експлицитна сексуална содржина.

— реклама —

Потоа осомничените ги разменувале материјалите преку апликацијата „Телеграм“ и преку други специјализирани чет-апликации.

При претресите во нивните домови и други простории што ги користеле, полицијата запленила компјутери на кои биле пронајдени фотографии и видеозаписи со сексуална злоупотреба на деца.

Од српското Министерство за внатрешни работи соопштија дека во текот на 2025 и 2026 година биле уапсени 75 лица осомничени за кривични дела поврзани со злоупотреба на деца во дигиталното опкружување, при што во голем број случаи онлајн предаторите воспоставиле директен контакт со своите жртви.