Српско оружје преку Чешка и Бугарија до Украина? Москва со сериозни обвинувања

Руската Служба за надворешно разузнавање (СВР) преку своето прес-биро објави наводи дека српската воена индустрија преку трети земји придонесува за вооружувањето на украинската армија. Според нив, извозот на муниција и оружје произведено во Србија, особено за артилериски системи, се зголемил и покрај дипломатскиот притисок од Москва кон Белград.

— реклама —

Се тврди дека опремата се извезува во земји членки на НАТО, каде потоа се склопува или доработува, со што формално не се води како директен извоз во Украина. Како главни дестинации се посочени Чешка и Бугарија.

— реклама —

Во извештајот се споменуваат и конкретни компании – како „Крушик“ од Ваљево и „Елинг“ од Лозница – чии производи, според СВР, завршуваат кај западни компании кои, пак, се поврзуваат со испораки на оружје за Киев.

— реклама —

СВР, како што се наведува во нивното соопштение, го осудува овој тренд и ја обвинува Србија за „политичка двосмисленост“, тврдејќи дека ваквите постапки се спротивни на „традиционалните врски меѓу српскиот и рускиот народ“.

— реклама —

Наводите не се потврдени од независни извори, ниту од надлежни институции во Србија.