Сопственикот на „Апартмани Шабан Адемоски“ од струшкото село Подгорци јавно реагираше откако добил фактура од Здружението за заштита на авторски музички права (ЗАМП) во износ од 16.650 денари.
На социјалните мрежи тој објави фотографии од фактурата и писмото што ги добил од ЗАМП, прашувајќи по кој основ треба да плати авторски надомест.
„Кој може да ми објасни? Веројатно и тие ме следат што го пратат овој профил. Кои авторски права ги имам користено? Кое е тоа здружение за наплата, што сакаат – и за петлите наутро да почнат да наплаќаат? Јас сум јавна личност и дали некој приметил дека го кршам правото на некој автор? Нека ми се јави авторот, веднаш ќе го избришам засекогаш“, напиша Адемоски.
Според документите што ги објави, фактурата е издадена за период од шест месеци и се однесува на авторски надомест за јавно соопштување на музички дела, согласно Законот за авторското право и сродните права и тарифникот на ЗАМП.
Во дописот до Адемоски, ЗАМП наведува дека фактурата е доставена за „измирување на авторски надомест за јавно соопштување на авторски музички дела“ и бара обврската да биде подмирена во законски определениот рок.
Засега нема официјална реакција од ЗАМП по објавата на Адемоски. Доколку добиеме нивен став, истиот ќе биде објавен.
