Пратеникот на ВМРО-ДПМНЕ, Бојан Стојаноски, преку објава на Фејсбук ги отфрли критиките на СДСМ за економските политики на Владата, наведувајќи дека официјалните економски показатели покажуваат позитивни трендови.
Стојаноски посочува дека, според податоците на Државниот завод за статистика, годишната инфлација во јули 2026 година се намалила на 2,3 проценти, при што, како што наведува, од април до јули е забележан континуиран пад.
Во објавата тој истакнува дека во првата половина од годинава извозот пораснал за околу осум проценти, индустриското производство за 6,5 проценти, преработувачката индустрија за 7,9 проценти, а бруто-домашниот производ во првиот квартал бележи раст од 3,1 процент. Според него, намалена е и стапката на невработеност, додека буџетските приходи бележат раст.
Стојаноски оценува дека овие показатели покажуваат дека економијата се движи во позитивна насока и ја обвинува СДСМ дека во јавноста пласира, како што наведува, неточни тврдења за економската состојба во државата.
