Тешка сообраќајна несреќа на железнички премин меѓу Лалиќ и Оџаци во Србија однесе два човечки животи, откако патнички воз удрил во автомобил во кој се превезувале 27-годишна жена и нејзиниот тригодишен син.
Мајката и детето починале на местото на несреќата, а според првичните информации, возилото било целосно уништено од силниот удар.
Според неофицијални сознанија, во моментот кога автомобилот се приближувал до преминот, полубраниците биле спуштени. Се претпоставува дека возачката се обидела да ги заобиколи и да ја премине железничката пруга непосредно пред минувањето на возот.
Од силината на судирот, возот го оттуркал и влечел автомобилот околу 200 метри по шините пред конечно да запре.
На местото веднаш пристигнале полициски екипи, Итната медицинска помош и пожарникари-спасувачи, кои со специјална опрема го извлекле уништеното возило.
Надлежните служби извршиле увид, а истрагата треба да ги утврди сите околности и точната причина за несреќата.
