Судењето против 13-те полицајци поврзани со пожарот во „Пулс“ почна од почеток

Судењето против 13 полициски службеници обвинети за тешки дела против општата сигурност, во врска со пожарот во дискотеката „Пулс“ во Кочани, започна одново поради промени во составот на судечкиот совет.

— реклама —

Причина за повторното започнување на постапката е тоа што еден од поротниците, поради здравствени причини, повеќе од еден месец нема да може да присуствува на судењата, додека вториот известил дека, поради други ангажмани, нема да продолжи да учествува во судскиот процес.

Судењето го води судијката Фанка Јанчулева Михаиловска, а обвинението го застапува јавната обвинителка Спасенка Андонова, која потврди дека Обвинителството во целост останува на обвинението.

— реклама —

На повтореното рочиште обвинетите Дејан Салтировски, Ванчо Георгиевски, Марија Маневска, Томе Донев, Драган Петрушев, Кире Богатинов, Стојанче Филипов, Благица Митева, Кристина Николова, Мазлум Рамаданов, Дарко Милошевски, Мартин Арсовски и Маријан Радевски повторно се произнесоа за обвинението. Сите се повикаа на претходно дадените искази и не признаа вина.

— реклама —

Од Судот информираат дека доказите што досега биле изведени, како и исказите на сослушаните сведоци, се преземаат во новата постапка. По нивното преземање, доказната постапка продолжува со сослушување на сведоци предложени од Обвинителството.

Предметот се однесува на пожарот што избувна на 16 март 2025 година во дискотеката „Пулс“ во Кочани. Во трагедијата загинаа 63 лица, а повеќе од 200 беа повредени.

Според обвинението, полициските службеници кои биле на должност во критичниот период биле ангажирани и во дискотеката, но не ја прекинале забавата и не спречиле употреба на пиротехнички средства.