Основниот суд во Струга му го врати пасошот на бизнисменот Борче Марковски, кој е обвинет за злоупотреби поврзани со јавни набавки во РЕК „Битола“.
Информацијата ја потврди претседателот на Основниот суд во Струга, судијата Вулнет Винца.
„Пасошот на обвинетиот Борче Марковски му е вратен со одлука на судот бидејќи приложил гаранција во вредност од над пет милиони евра. Според законот, не може истовремено да има гаранција во имот и да му биде одземен пасошот. Или едното или другото“, изјавил Винца.
На Марковски и на уште осум лица им се суди за дислокација на погонските станици од рудникот „Осломеј“ во рудниците на РЕК „Битола“, во постапка поврзана со тендер вреден над 1,7 милиони евра.
Покрај Марковски, обвинети се и петмина вработени во РЕК „Битола“ и двајца вработени во неговата компанија.
Меѓу обвинетите е и поранешниот директор на РЕК „Битола“, Пеце Матевски, кому веќе му се суди и во Основниот суд во Битола во друг предмет поврзан со тендерот за ископ на јаловина со битолската компанија „Рудкоп“.
Судската постапка првично започна во Основниот суд во Битола, а потоа беше целосно префрлена во Основниот суд во Струга.
Според претседателот на судот, следното рочиште во предметот е закажано за 2 септември.
