Шумски пожар во Италија се шири над езерото Гарда, стотици луѓе евакуирани

Голем шумски пожар избувна во близина на езерото Гарда во северна Италија, поради што повеќе од 200 луѓе се евакуирани, меѓу кои и десетици туристи, објави ДПА.

— реклама —

Пожарот ја зафати територијата на општината Тињале, на западниот брег на езерото Гарда, кое е најголемото езеро во Италија и една од најпопуларните туристички дестинации во земјата.

Како превентивна мерка, евакуирани се туристи од едно одморалиште, како и луѓе од неколку други објекти во околината. Според противпожарната служба, огнот брзо се проширил во текот на ноќта во планинската област над брегот на езерото.

— реклама —

Голем број пожарникари и утрово продолжија со гаснењето, но пожарот сè уште не е ставен под контрола. Приоритет е локализирање на огнената стихија и заштита на неколку станбени објекти.

— реклама —

Во акцијата се вклучени и противпожарни авиони и хеликоптери.

Пожарот избувна во период кога Италија со недели се соочува со топлотен бран, со температури кои во одредени делови од земјата надминуваат 40 степени Целзиусови.

Речиси сите поголеми градови во Италија во моментов се под црвено предупредување поради здравствените ризици од екстремните температури. Истовремено, поради сушните услови, значително е намалено и нивото на реката По, најдолгата река во земјата.