Шут карта: Мицкоски планира промени во Владата, двајца министри под прашалник

На почетокот на следната година се очекува мала реконструкција на Владата, во која, според неофицијални информации, ќе бидат сменети најмалку двајца министри од актуелниот состав. Промените се очекуваат во Министерството за правда и Министерството за култура, каде премиерот Христијан Мицкоски е најнезадоволен од работата на министрите Игор Филков и Зоран Љутков.

— реклама —

Информациите за можни смени кружат со месеци, но засега Владата официјално не потврдува дека се водат разговори или дека постои конечна одлука. Сепак, Мицкоски уште пред парламентарните избори најави дека ќе има реконструкција на владината постава по стабилизирањето на институциите.

— реклама —

Лидерот на ЗНАМ, Максим Димитриевски, чија партија го предложи Филков за министер за правда, во гостувањето во подкастот „Претрес“ рече дека не слушнал за можни смени и изјави дека е задоволен од работата на Филков.

И покрај тоа, незадоволството на премиерот од овој ресор е тема која периодично се отвора, особено поради недоволниот напредок во реформите во правосудството.

— реклама —

Што се однесува до културата, смената на Зоран Љутков се смета за посигурна, поради низа критики и протести на негови колеги, уметници и културни работници. Последниве месеци Љутков интензивно преку јавни и спонзорирани објави ја промовира својата работа, но тоа не ги намали реакциите во секторот.

— реклама —

Иако од Владата тврдат дека „засега нема договор за замени“, изворите во коалицијата велат дека одлуките ќе се конкретизираат по новогодишните празници, а реконструкцијата ќе биде претставена пред јавноста.