Сузбиена 21-члена криминална група: Претреси на 36 локации, запленети дрога, оружје, пари и возила

На 30 септември МВР спровело координирана полициска акција во која, по повеќемесечна истрага, била сузбиена 21-члена организирана криминална група. Според МВР, групата била составена од 20 лица од Прилеп и едно од Скопје, а била инволвирана во недозволена трговија со дрога и економски криминал.

Во акцијата, спроведена во соработка со Управата за финансиско разузнавање и Одделот за специјални полициски операции, а под раководство на јавен обвинител од ОЈО за гонење на организиран криминал и корупција, биле извршени претреси на 36 локации кај 31 лице. Од нив, 33 локации биле на подрачјето на Прилеп, две во Скопје и една во Струга.

— реклама —

Од слобода биле лишени 20 лица. При претресите биле пронајдени и одземени тревкаста, бела прашкаста и грутчеста материја, гасен пиштол, муниција, поголема сума пари во денари и девизи, патнички возила, мотоцикли, мобилни телефони, дробилка, метален детектор и ваги.

До ОЈО за гонење на организиран криминал и корупција биле поднесени кривични пријави против сите 21 лице. Четири лица од Прилеп се пријавени за неовластено производство и пуштање во промет на наркотични дроги, психотропни супстанции и прекурсори, како и за перење пари и други приноси од казниво дело. За истото кривично дело поврзано со дрога се пријавени уште 16 лица од Прилеп, додека 75-годишно лице од Скопје е пријавено за перење пари и други приноси од казниво дело.

— реклама —

Според наводите во кривичната пријава, Н.В. и М.С. во периодот од февруари до октомври 2026 година создале организирана криминална група за трговија со дрога и оружје и економски криминал.

— реклама —

МВР наведува дека Н.В. и М.С. од различни лица набавувале кокаин и марихуана, кои ги чувале на безбедни локации во Скопје и Прилеп, а потоа организирале мрежи на препродавачи во повеќе градови. Според пријавата, марихуаната се продавала по цена од 500 до 800 денари за грам, а кокаинот од 4.000 до 6.000 денари за грам.

Парите од продажбата, според МВР, им биле предавани на организаторите, кои дел од средствата им го давале на препродавачите како награда. Средствата потоа биле користени за купување движен и недвижен имот.

Во периодот од 2025 до 2026 година, според кривичната пријава, пет лица внеле во легалниот платен промет пари за кои знаеле дека потекнуваат од трговија со дрога, со цел да се прикрие нивното понатамошно движење и потекло. Станува збор за вкупно 4.990.270 денари и 64.670 евра.

Од МВР информираат дека акцијата е резултат на повеќемесечно криминалистичко истражување и обезбедени материјални докази.