Свечена манифестација за Денот на ослободувањето на Скопје, доделени наградите „13 Ноември“

Со свечена манифестација, Град Скопје вчеравечер го одбележа 13 Ноември – Денот на ослободувањето на градот. По тој повод, градоначалникот Орце Ѓорѓиевски им ги додели признанијата на годинашните добитници на наградата „13 Ноември“, кои со своето знаење, творештво, труд и човечност придонесуваат за развојот на Скопје и неговиот углед.

— реклама —

Во своето обраќање, Ѓорѓиевски потсети на храброста и жртвата на борците кои пред 82 години го ослободија Скопје, нагласувајќи дека слободата што денес ја живеат граѓаните е платена со човечки животи и неостварени соништа.

Тој истакна дека обврска на сегашните генерации е да го чуваат споменот на ослободителите и да создаваат град достоен за нивната жртва. Притоа, им се заблагодари на добитниците на признанијата за нивниот придонес кон Скопје и за примерот што им го даваат на младите.

— реклама —

Градоначалникот посочи дека неговата заложба е изградба на уредно, зелено, безбедно и современо Скопје, во кое секое населено место ќе добива внимание, а граѓаните ќе имаат подобри услови за живот.

— реклама —

Тој додаде дека дел од проектите што со години биле одложувани сега се придвижени, а големите капитални проекти се во завршна фаза.

„На овој голем ден, ја наведнуваме главата пред жртвата на ослободителите, а ја креваме со решителност пред обврските што ни ги носи иднината. Нивната храброст нека нè води. Нивната љубов кон Скопје нека нè обединува. Нашите дела нека покажат дека сме достојни за слободата што ни ја оставија“, порача Ѓорѓиевски.

— реклама —

Тој упати честитка по повод 13 Ноември и оддаде почит на сите кои го ослободиле градот.