Сведок на судењето против полициските службеници за „Пулс“: Побарал помош, но полицаецот рекол дека тоа не е негова работа

Судењето против полициските службеници и нивни надредени, обвинети во врска со трагичниот пожар во дискотеката „Пулс“ во Кочани, продолжи со сведочења на тројца сведоци. На рочиштето присуствуваа и родители на дел од младите кои ги загубија животите во пожарот на 16 март 2025 година.

Меѓу сведоците беше и Николче Ефремов, кој ја преживеал трагичната ноќ. Тој пред судот детално раскажа за случувањата во дискотеката откако избувнал пожарот.

— реклама —

Ефремов сведочеше дека бил со двајца пријатели во близина на бината кога еден од пејачите преку микрофон соопштил дека избил пожар. Тој се обидел да се заштити со дуксерите на пријателите, но излезот бил блокиран од големиот број луѓе.

Во хаосот, како што опиша, дошло до туркање, паѓање и повреди. На него паднал дел од ѕид, а подоцна бил извлечен од насобраните луѓе. Откако излегол, помогнал да биде однесен повреден пријател во болница, а потоа се вратил во дискотеката.

— реклама —

Сведокот раскажа и за обидот со неговиот пријател Бојан Гигов да му помогнат на Давид Костов, кој бил затрупан со други лица во тоалетот. Според неговото сведочење, таму имало и полициски службеник, од кого побарал помош, но добил одговор дека тоа не е негова работа.

Ефремов пред судот посочи дека пред пожарот забележал и полициски службеник во цивилна облека и дека дознал оти во „Пулс“ се вршела полициска контрола.

— реклама —

Според обвинението, 13-те обвинети се товарат за тешки дела против општата сигурност, поврзани со начинот на кој била спроведена акциската контрола во дискотеката.

Обвинителството тврди дека обвинетите не презеле мерки за спречување на активирањето на пиротехнички средства за време на настапот на групата „ДНК“, иако нивното користење не било пријавено во Полициската станица Кочани. Според обвинението, пожарот што потоа избувнал довел до смрт на 63 лица, додека повеќе од 200 лица биле повредени.

Во овој предмет обвинети се Дејан Салтировски, Ванчо Георгиевски, Марија Маневска, Томо Донев, Драган Петрушев, Кире Богатинов, Стојанче Филипов, Благица Митева, Кристина Николова, Мазлум Рамаданов, Дарко Милошевски, Мартин Арсовски и Марјан Радевски.

Обвинението го застапува јавната обвинителка Спасенка Андонова од ОЈОГОКК.