Шведски министер: Губиме цела генерација поради бескрајното скролање

Шведска размислува за воведување минимална старосна граница од 15 години за користење на социјалните мрежи, согласно препораките на владина комисија која ги анализирала последиците од дигиталните платформи врз децата и младите.

— реклама —

Истражувачката Лиса Енглунд Крафт изјави дека придобивките од ваквата мерка ги надминуваат аргументите за неограничен пристап до социјалните мрежи.

Според предлогот, компаниите кои управуваат со социјалните платформи би биле одговорни за проверка на возраста на корисниците. Во моментов во Шведска постои правило според кое децата помлади од 13 години можат да отворат профил само со согласност од родителите.

— реклама —

Шведскиот министер за социјални прашања и јавно здравје, Јакоб Форсмед, предупреди дека прекумерното користење на социјалните мрежи станува сериозен општествен проблем.

— реклама —

„Губиме цела генерација поради бескрајното скролање“, изјави Форсмед, додавајќи дека влијанието на екраните и социјалните мрежи врз здравјето на децата и младите е еден од најголемите предизвици на денешницата.

Слични мерки се разгледуваат и во други европски земји. Во соседна Норвешка, владата најави дека до крајот на годината ќе предложи закон со кој користењето социјални мрежи ќе им биде забрането на лица помлади од 16 години.

Пионер во ваквите ограничувања е Австралија, која минатата година стана првата земја во светот што воведе забрана за користење социјални мрежи за лица помлади од 16 години.