Администрацијата на американскиот претседател Доналд Трамп ги повика европските држави да воведат ограничувања за патување на лица кои неодамна престојувале во земјите од централна Африка, погодени од епидемијата на ебола.
Според информациите на Ројтерс, целта на американскиот апел е да се спречи евентуално ширење на вирусот за време на Светското првенство во фудбал. На 1 јуни Вашингтон испратил дипломатска нота до европските влади, изразувајќи загриженост и барајќи слични мерки како оние што веќе ги применуваат САД. Засега нема официјален одговор од европските земји.
Американските центри за контрола и превенција на болести минатиот месец забранија влез во САД за странски државјани кои во последните три недели престојувале во Демократска Република Конго, Уганда или Јужен Судан.
Во меѓувреме, Светската здравствена организација предупреди дека напорите за следење на контактите на заразените лица сè уште не се на посакуваното ниво. Моментално се следат околу 62 проценти од контактите, додека целта е да се достигнат меѓу 90 и 95 проценти.
Дополнителен проблем претставуваат недовербата кај населението и нападите врз медицинските и погребните тимови. Последниот таков инцидент бил регистриран во градот Бунија, каде што две лица биле тешко повредени, а две возила оштетени.
Според последните податоци на СЗО, потврдени се 550 случаи на ебола, вклучително и 101 смртен случај, додека уште 94 случаи се сметаат за сомнителни. Здравствените власти предупредуваат дека вирусот, од сојот Бундибуџо, најверојатно се ширел незабележано со недели, што дополнително ги отежнува напорите за ставање на епидемијата под контрола.
