Нов топлотен бран веќе се формира над Атлантикот и во текот на неделава ќе донесе екстремно високи температури во повеќе делови од Европа, предупреди регионалниот директор на Светската здравствена организација (СЗО) за Европа, д-р Ханс Хенри П. Клуге.
Според прогнозите, во Португалија и јужна Шпанија температурите ќе достигнат до 43 Целзиусови степени, додека Франција и земјите од Бенелукс се подготвуваат за нов топлотен удар. Во меѓувреме, делови од Централна Азија веќе бележат температури повисоки од 40 степени.
Поради сериозноста на ситуацијата, СЗО организираше вонреден состанок на кој учествуваа претставници на 41 земја-членка, Европската комисија и граѓански организации. На состанокот се разговарало за искуствата од претходните топлотни бранови и за подготвеноста на земјите за новите екстремни горештини.
Клуге оцени дека националните акциски планови за справување со екстремните температури спасуваат животи и ги посочи Италија, Шпанија, Австрија, Белгија и Франција како примери на земји што успешно ги координирале своите здравствени системи.
Сепак, тој предупреди дека најголемиот проблем е што помалку од половина од земјите во европскиот регион имаат национален план за заштита на здравјето при екстремни горештини.
„Многу луѓе и натаму не препознаваат дека се лично загрозени, дури и кога е прогласен црвен аларм. Во голем број држави недостигаат климатизирани јавни простори, а административните процедури често го одложуваат прогласувањето топлотен бран, што ја забавува реакцијата на здравствените служби“, предупреди Клуге.
Тој истакна дека екстремната жештина треба да се третира како закана за здравствената безбедност, а не само како временска појава. Особено ранливи, според него, остануваат старите лица, бездомниците и социјално изолираните граѓани, поради што е неопходно здравствените системи да станат поотпорни на климатските промени.
Од СЗО најавуваат дека ќе ги сумираат искуствата и препораките од состанокот и ќе им ги стават на располагање на сите 53 земји-членки, со цел тие подобро да се подготват за идните екстремни топлотни бранови.
