САД во изминатите четири месеци во тајност спроведувале операција за отстранување морски мини од Ормускиот Теснец, во обид да се овозможи продолжување на поморскиот сообраќај низ оваа стратешки важна морска рута, објави „Фајненшел тајмс“.
Операцијата, која главно се изведувала во текот на ноќта, вклучувала нуркачи на американската морнарица, роботизирани пловила и специјализирана подводна опрема. Според извори запознаени со операцијата, таа започнала по нападите на САД и Израел врз Иран во февруари.
Американските нуркачи работеле во мали тимови, користејќи чамци на надувување, роботизирани пловила и подводни дронови опремени со сонари со висока резолуција за откривање на мините.
Откако мините биле лоцирани, нуркачите им се приближувале и поставувале експлозивни средства за нивно уништување. Според досегашните информации, нема пријавени американски жртви поврзани со операцијата.
Експертите предупредуваат дека чистењето морски мини е исклучително ризична и бавна операција, при што бродовите и хеликоптерите ангажирани во процесот имаат ограничени можности за заштита.
Сопственици на бродови и безбедносни советници сметаат дека најверојатно е исчистена јужната половина од Ормускиот Теснец, во близина на брегот на Оман, каде што САД ги насочуваат бродовите.
Сепак, тие предупредуваат дека нема доволно информации за да се заклучи дека целиот Теснец е безбеден од преостанати мини.
