„Така не се протестира, туку се дезертира“: Мицкоски објасни зошто Македонија не го бојкотирала Нетанјаху

Премиерот Христијан Мицкоски го образложи ставот на македонската делегација во врска со обраќањето на израелскиот премиер Бенјамин Нетанјаху на Генералното собрание на Обединетите нации, откако дел од странските делегати демонстративно ја напуштија салата.

— реклама —

Запрашан зошто македонската делегација не го напуштила обраќањето како форма на протест, Мицкоски рече дека за него таквиот потег би претставувал „дезертирање од реалноста и суштината“.

— реклама —

„Јас не сум човек кој не сака да се соочи со реалноста. За мене бегање е дезертирање. Така не се манифестира протест, туку се дезертира од реалноста и суштината. Има покреативни работи за тоа. Јас сакам да се борам и да победувам“, рече Мицкоски.

— реклама —

Десетици дипломати и делегати ја напуштија салата кога Нетанјаху го започна своето обраќање пред Генералното собрание на ОН. На ваков чекор претходно повика палестинската делегација, а напуштањето на салата беше претставено како протест против политиките на израелската влада.

Од македонското Министерство за надворешни работи претходно беше потврдено дека претставник на македонската делегација присуствувал во салата за време на говорот на Нетанјаху, без да биде соопштено за кој претставник станува збор.