Температурите до 40 степени носат поголем ризик од труење со храна, предупредува АХВ

Поради најавените температури кои во наредните денови ќе достигнуваат и до 40 Целзиусови степени, Агенцијата за храна и ветеринарство (АХВ) апелира до граѓаните да бидат особено внимателни при купување, транспорт, складирање и подготовка на храната, бидејќи значително се зголемува ризикот од труење.

— реклама —

Од АХВ предупредуваат дека екстремно високите температури претставуваат опасност не само за луѓето, туку и за животните, па затоа е потребно навремено да им се обезбедат доволно свежа вода и безбедна храна.

Граѓаните се советуваат храната да ја купуваат исклучиво од проверени продажни места, каде што производите, особено оние од животинско потекло, се чуваат во соодветни услови. Исто така, не треба да се купуваат производи со оштетена или надуена амбалажа, а разладената и замрзнатата храна е препорачливо да се зема на крајот од пазарењето.

— реклама —

Лесно расипливите производи, како месото, млекото и јајцата, не треба подолго време да се оставаат во автомобил или изложени на високи температури. Разладената храна треба да се чува на температура под пет степени Целзиусови, додека храната што се подготвува термички мора да биде добро зготвена.

— реклама —

АХВ препорачува овошјето и зеленчукот темелно да се мијат под млаз вода, а суровото месо, млекото и јајцата да бидат соодветно обработени пред консумирање. По подготовката, храната треба брзо да се излади и да се чува во фрижидер, при што зготвената храна треба да биде поставена на горните полици, а суровата на долните, за да се спречи меѓусебна контаминација.

При јадење во угостителски објекти, Агенцијата советува да се избираат локали кои ги почитуваат хигиенските стандарди. Во објектите за брза храна се препорачува да се избегнуваат мајонез, крем-салати, сосови и преливи доколку не се чуваат во разладни уреди.

„Доколку се сомневате дека храната не е безбедна, не ризикувајте – фрлете ја“, апелираат од Агенцијата за храна и ветеринарство.