Тензија над Корејскиот Полуостров: Кинески и руски авиони влегоа во воздушната зона на Јужна Кореја

Јужна Кореја денеска итно подигна борбени авиони откако речиси десет кинески и руски воени летала накратко влегоа и потоа ја напуштија јужнокорејската зона за идентификација на воздушната одбрана (KADIZ).

— реклама —

Според соопштението на Здружениот генералштаб на Јужна Кореја, авионите не го нарушиле територијалниот воздушен простор на земјата, туку навлегле во пошироката зона за воздушна идентификација над источните и јужните води, по што се повлекле, пренесе агенцијата Јонхап.

— реклама —

Јужнокорејската војска соопшти дека леталата биле детектирани уште пред нивниот влез во KADIZ, по што биле подигнати борбени авиони за следење на ситуацијата и евентуална реакција.

— реклама —

Зоната KADIZ не претставува територијален воздушен простор, туку подрачје во кое од странските летала се очекува да се идентификуваат со цел да се спречат инциденти и недоразбирања.

Според јужнокорејските власти, инцидентот се случил за време на заедничките воздушни воени вежби што Кина и Русија ги спроведувале во регионот.