Педесет и шестгодишна жена од Охрид се здобила со тешки телесни повреди во сообраќајна несреќа што се случила на булеварот „Македонски Просветители“, информира Министерството за внатрешни работи.
Според МВР, несреќата била пријавена на 3 јули во 14:45 часот. Во неа учествувале запрено патничко возило „Киа“ со охридски регистарски ознаки, кое претходно го управувал А.А. (58), електричен мопед „Јадеа“ со охридски регистарски ознаки, управуван од И.Н. (39), како и 56-годишната пешачка С.А., сите од Охрид.
Во текот на несреќата, електричниот мопед удрил во пешачката, која се здобила со тешки телесни повреди. Повредите биле констатирани во Специјалната болница „Св. Еразмо“ во Охрид.
Увид на местото на настанот извршила екипа на СВР Охрид.
