Малолетен сопатник е тешко повреден во сообраќајна несреќа што се случила на автопатот Тетово–Скопје, во близина на наплатната рампа Глумово.
Според информациите од Министерството за внатрешни работи, несреќата била пријавена на 14 јули околу 19:30 часот, а во неа учествувале „фолксваген кеди“ со скопски регистарски ознаки, управуван од А.И. (33) од Скопје, и „фолксваген голф“ со охридски регистарски ознаки, управуван од 39-годишната Л.А. од селото Патишка Река.
Во судирот, малолетен сопатник од возилото „фолксваген голф“ се здобил со тешки телесни повреди. Со телесни повреди се здобиле и двајцата возачи, сопатникот М.А. (24), како и уште една малолетна сопатничка од истото возило.
Повредените биле пренесени во Комплексот клиники „Мајка Тереза“ и во Градската општа болница „8 Септември“, каде што им биле констатирани повредите.
Увид на местото на несреќата извршила увидна екипа на СВР Скопје.
