Тетовец на социјалните мрежи: „Добив казна дека не возам по велосипедска патека, а патеката беше блокирана со возила и контејнери“

Жител на Тетово преку објава на социјалните мрежи реагираше на казна што ја добил додека управувал електричен тротинет по, како што тврди, обележана велосипедска патека на булеварот „Илинденска“.

Според неговото сведоштво, бил запрен од полициски службеници во близина на Земјоделското училиште, при што му била побарана лична карта и му било соопштено дека не смее да се движи по коловозната лента.

— реклама —

Граѓанинот наведува дека во моментот се движел по дел од улицата кој е обележан со црвена боја и се користи како велосипедска патека. Тој посочува дека патеката била попречена со паркирани возила, контејнери, па дури и службено полициско возило.

Во објавата тврди дека при разговорот со полицаецот добил објаснување оти патеката повеќе не се смета за велосипедска патека, иако според него таа сè уште е соодветно обележана на терен.

— реклама —

Незадоволен од постапката, граѓанинот одбил да го потпише прекршочниот налог, за кој вели дека изнесувал 80 евра. Воедно, направил фотографии од состојбата на теренот, на кои, според неговите тврдења, се гледаат непрописно паркирани возила и други пречки на патеката.

„Целта на објавата е некој да ми објасни дали велосипедските патеки во Тетово сè уште се велосипедски патеки или се претворени во паркинг-простор за возила и контејнери“, напиша тој.

— реклама —

Неговата реакција предизвика бројни коментари на социјалните мрежи, каде граѓаните дебатираат за состојбата со велосипедската инфраструктура и правилата за движење на велосипедисти и корисници на електрични тротинети во градот.

Засега нема официјален став од надлежните институции во врска со наводите изнесени во објавата.

— реклама —