Премиерот Христијан Мицкоски денеска објави нова странска инвестиција во Технолошко-индустриската развојна зона Тетово, каде што компанијата „Џаво Аутомотив“ ќе инвестира околу 20 милиони евра и ќе отвори до 412 нови работни места.
Според најавата, компанијата е глобален производител за автомобилската индустрија со повеќе од 40 години искуство, а од производствениот капацитет во Тетово ќе се изработуваат автомобилски компоненти за светски познати брендови. Во полн капацитет, извозот на компанијата се очекува да достигне околу 45 милиони евра годишно.
„Ова е уште една потврда дека довербата во македонската економија расте, дека инвеститорите ја препознаваат стабилноста и дека државата повторно станува атрактивна дестинација за нови вложувања“, напиша Мицкоски.
Новата инвестиција доаѓа во зона која во изминатите години беше поврзувана со еден од најавуваните, но нереализирани проекти во државата.
Во август 2022 година, тогашниот прв вицепремиер Артан Груби, заедно со лидерот на ДУИ, Али Ахмети, поставија камен-темелник на фабриката „Некст е.Го мобиле“, каде што требаше да се произведуваат електрични автомобили според германска лиценца.
Тогаш беше најавена инвестиција од 130 милиони евра и отворање на околу 900 работни места. Инвеститор беше Љазим Дестани преку компанијата „Еколог“, а според најавите, фабриката требаше да произведува до 30.000 електрични автомобили годишно, при што првото возило требаше да излезе од производствената лента во 2024 година.
Сепак, проектот никогаш не започна со реализација. Во 2024 година, Дирекцијата на ТИРЗ соопшти дека го запира извршувањето на договорот и сите постапки за доделување државна помош, откако германската матична компанија поднесе барање за несолвентност.
Од ТИРЗ тогаш информираа дека не биле исплатени никакви државни средства кон инвеститорот, а единствено што остана од проектот беше поставениот камен-темелник.
Со новата инвестиција на „Џаво Аутомотив“, Владата се обидува повторно да ја активира зоната во Тетово и да донесе производство во секторот на автомобилската индустрија, но со значително помал обем од првично најавуваниот проект за електрични автомобили.
