Со почетокот на летниот распуст, градскиот базен во Тетово повторно стана едно од најпосетуваните места за рекреација и разладување. Објектот е ставен на располагање на сите граѓани, а интересот, според надлежните, секојдневно се зголемува.
Граѓаните велат дека ваквите спортско-рекреативни капацитети се неопходни не само во поголемите градови, туку и во помалите населени места и во селата. Дел од нив посочуваат дека редовно ги носат своите деца на базен за да научат да пливаат, но и поради позитивното влијание врз здравјето.
Градскиот базен работи од понеделник до петок во периодот од 08:30 до 16:30 часот, додека за време на викендите е отворен од 09:00 до 21:00 часот. Дополнително, секоја среда и сабота до 12:00 часот, базенот е наменет исклучиво за жени и девојки.
Раководителот на Секторот за спорт при Општина Тетово, Мухамед Авзиу, истакна дека најголема посетеност има за време на викендите, но дека базенот го користат посетители од сите возрасни категории.
„Интересот е навистина голем и бројот на посетители постојано расте. Освен деца кои доаѓаат со своите родители, базенот го посетуваат и повозрасни лица. Има и граѓани кои доаѓаат по препорака од лекар, особено лица со проблеми со зглобовите и мускулно-скелетниот систем“, изјави Авзиу.
Во меѓувреме, во Тетово се реализираат и нови проекти за развој на спортската инфраструктура. Во тек е изградбата на уште два базени – во средното училиште „Кирил и Методиј“ и во основното училиште „Наим Фрашери“. Покрај тоа, во градот функционираат и неколку отворени базени со кои управуваат приватни компании.
