Техеран ги обвини Емиратите за соучесништво во нападите

Иран официјално побара обештетување од Обединетите Арапски Емирати, обвинувајќи ги дека дозволиле американски напади врз иранска територија да бидат извршени од нивна територија.

— реклама —

Во писмо до генералниот секретар на Обединетите нации, иранскиот амбасадор при ОН, Амир Саид Иравани, наведе дека ваквата одлука на ОАЕ претставува прекршување на меѓународното право и повлекува „државна одговорност“.

Техеран смета дека Емиратите имаат обврска да ја надоместат целокупната материјална и нематеријална штета предизвикана од нападите.

— реклама —

Паралелно со дипломатската офанзива, Иран продолжува со напади во регионот на Персискиот Залив. Шефот на иранската дипломатија, Абас Аракчи, изјави дека нападите во близина на урбани подрачја се последица на преместувањето на американските сили од воени бази во хотели во градските средини.

— реклама —

Тој призна дека земјите од регионот се вознемирени и дека има жртви, но одговорноста за почетокот на конфликтот ја лоцираше кај Соединетите Американски Држави.

Според податоците од емиратското Министерство за одбрана, земјите од Персискиот Залив се соочиле со повеќе од 2.000 напади со ракети и дронови, насочени кон дипломатски мисии, воени бази, нафтена инфраструктура и цивилни објекти.

Само кон Обединетите Арапски Емирати биле истрелани 189 балистички ракети и 941 дрон, од кои поголемиот дел биле пресретнати, но најмалку 71 дрон погодил цели на територијата на државата.