„Тојота“ сели дел од производството во САД, но не поради царините на Трамп

Јапонскиот производител „Тојота“ објави дека дел од производството на својот најпродаван пикап „Такома“ ќе го пресели од Мексико во САД, но компанијата нагласува дека одлуката не е донесена поради царините воведени од администрацијата на американскиот претседател Доналд Трамп.

— реклама —

Трамп ја поздрави одлуката, оценувајќи дека таа е доказ оти неговата царинска политика дава резултати. Сепак, од „Тојота“ велат дека станува збор за долгорочна деловна стратегија, а не за реакција на трговските мерки.

— реклама —

Иако царините беа воведени со цел да ги поттикнат производителите да отвораат фабрики во САД, повеќето автомобилски компании и понатаму претпочитаат да ги плаќаат дополнителните трошоци наместо да инвестираат милијарди долари во изградба на нови производствени капацитети.

Според експертите, изградбата на нова фабрика е долгорочна и скапа инвестиција, а неизвесноста околу идната трговска политика дополнително ги обесхрабрува производителите да прават големи промени.

— реклама —

И покрај тоа што царините сериозно влијаат врз профитот на компаниите, тие досега имаа ограничен ефект врз преселувањето на производството во САД. Освен „Тојота“, и „Џенерал моторс“ најави префрлање на дел од производството од Мексико, но во постојни американски фабрики, без изградба на нови погони.

— реклама —

Експертите оценуваат дека деловната логика, трошоците за работна сила и стабилноста на пазарот остануваат поважни фактори од политичките одлуки при изборот каде ќе се произведуваат автомобилите.