Поголем дел од Србија денеска е под црвен метеоаларм поради екстремно високите температури, а во неколку градови се измерени и 40 Целзиусови степени, соопшти Републичкиот хидрометеоролошки завод на Србија.
Највисока температура од 40 степени е измерена во Кикинда, Зрењанин, Палиќ и Сомбор. Во Нови Сад, Банатски Карловац и Сремска Митровица се измерени 38 степени, додека во Белград, Ваљево и Крагуевац живата на термометарот достигнала 39 степени.
И во планинските предели температурите се значително повисоки од вообичаеното за овој период од годината. На Копаоник се измерени 24 степени, на Златибор 27, а на Црн Врв дури 31 степен.
По критиките од јавноста дека не биле преземени навремени мерки за справување со топлотниот бран, градските власти во Белград денеска поставија цистерни со вода за пиење во централното градско подрачје и на повеќе локации на јавниот превоз.
Во меѓувреме, голем број општини низ Србија апелираа до граѓаните рационално да ја користат водата, со цел да не се наруши редовното водоснабдување во периодот на екстремни горештини.
Метеоролозите најавуваат дека по топлотниот бран, во среда и четврток се очекува промена на времето, проследена со локални невремиња, обилни врнежи, силен ветер и можна појава на град.
Според прогнозите, во четврток невреме е можно во поголемиот дел од Србија.
