Во Барселона денеска се измерени рекордни 40,5 степени Целзиусови, што е највисоката температура досега забележана во овој шпански град, соопштија регионалните метеоролошки служби.
Со тоа е надминат претходниот рекорд од 40 степени, измерен во јули 2024 година.
И покрај екстремните горештини, експертите посочуваат дека близината на Средоземното Море делумно го ублажува чувството на жештина во еден од најпосетуваните туристички градови во Шпанија.
Шпанската метеоролошка агенција AEMET вчера издаде црвено предупредување за екстремно високи температури во делови од Каталонија, Валенсија и Сарагоса, каде што се очекуваа максимални температури меѓу 40 и 42 степени.
Црвеното предупредување означува исклучително висок ризик, со можни сериозни последици по здравјето на населението и материјалните добра. Според прогнозите, топлотниот бран ќе трае најмалку до утре.
Шпанија е меѓу европските земји најсилно погодени од климатските промени и во последните години сè почесто се соочува со екстремни и долготрајни топлотни бранови.
