Голем дел од Соединетите Американски Држави и Канада се под удар на силен топлотен бран, кој во текот на неделата ќе донесе екстремно високи температури, висока влажност и тропски ноќи. Американската Национална метеоролошка служба издаде предупредувања за околу 120 милиони жители, непосредно пред празникот Ден на независноста – 4 јули.
Метеоролозите предупредуваат дека најтешко ќе бидат погодени источниот и централниот дел на САД. До четврток се очекува кулминација на жештините во Средниот Запад и долината на реката Мисисипи, по што топлотниот бран ќе се прошири кон источниот брег и долината на реката Охајо.
Дневните температури ќе се движат меѓу 35 и 40,6 степени Целзиусови, а поради високата влажност, чувството на топлина на места ќе достигнува и до 46 степени. Се очекува да бидат урнати повеќе дневни температурни рекорди, а можно е да паднат и месечни, па дури и апсолутни рекорди.
Властите ги повикаа граѓаните да избегнуваат престој на отворено во најтоплиот дел од денот, да внесуваат доволно течности и да користат климатизирани простории или јавни центри за разладување.
Поради високите температури, градоначалникот на Њујорк, Зохран Мамдани, го активираше градскиот план за справување со екстремни горештини, при што беа отворени стотици центри за разладување. Во Детроит, каде што температурата може да достигне 38 степени, на располагање се ставени десетина климатизирани рекреативни центри.
Жештините би можеле да влијаат и врз натпреварите од Светското првенство во фудбал. Според проценките, индексот на топлина на некои средби може да ја надмине границата што меѓународниот синдикат на фудбалери ФИФПро ја смета за ризична за игра. Најкритична се очекува да биде ситуацијата во Тексас, а високи температури се прогнозираат и за Атланта.
Топлотниот бран ја зафати и Канада, каде што во делови од Онтарио температурата ќе достигне до 37 степени. Во Торонто, кој ќе биде домаќин на натпреварот меѓу Хрватска и Португалија на Светското првенство, се очекуваат околу 35 степени. Поради горештините, во Онтарио е издадено портокалово предупредување, додека во делови од Квебек, вклучително и Монтреал, на сила е жолт аларм.
