Топлотниот бран предизвика проблеми во унгарската нуклеарна централа, воведени се посебни мерки

Рекордниот топлотен бран што ја зафати Унгарија предизвика сериозни проблеми во работата на нуклеарната централа Пакш, откако температурата на водата во Дунав ги надмина дозволените граници.

— реклама —

Според операторот МВМ, унгарскиот министер за енергетика Иштван Капитањ одобрил дводневно изземање на централата од прописите кои го ограничуваат загревањето на водата во Дунав, со цел да се спречи дополнително намалување на производството на електрична енергија.

— реклама —

Во понеделник температурата на Дунав во близина на централата достигна 30,2 Целзиусови степени, надминувајќи ја интервентната граница од 29,5 степени. Нуклеарната централа ја користи речната вода за ладење на реакторите, а поради високите температури веќе за време на викендот беше намалено производството на електрична енергија за вкупно 563 мегавати.

Операторот на електропреносната мрежа Мавир препорачал привремено изземање од правилата за температурата на речната вода за да се обезбеди стабилно снабдување со електрична енергија, а Министерството за енергетика ја прифати препораката.

— реклама —

Доколку не беше одобрено изземањето, централата ќе мораше дополнително да го намали производството за уште 640 мегавати, што би значело дека постројката со капацитет од два гигавати би работела со помалку од половина од својот капацитет.

— реклама —

Од МВМ соопштија дека и покрај изземањето, производството ќе мора да се намали за дополнителни 40 мегавати. Министерот Капитањ веднаш ги повика граѓаните во вечерните часови да ја намалат потрошувачката на електрична енергија за разладување.